Në vitin 1962 poeti, skenaristi, aktori dhe regjisori francez Jean Cocteau dërgoi një mesazh me rastin e Ditës Botërore të Teatrit - 27 marsit. Iniciativa për të caktuar një ditë të veçantë kushtuar një prej arteve më të lashta, të përhapura në të gjitha kulturat në mbarë botën, është Instituti Ndërkombëtar i Teatrit. Dhe mesazhi nga rrethet teatrore vjen çdo vit, i shprehur nga një prej artistëve me famë botërore.

Arti teatror e ka gjuhën e tij universale, krijon një lidhje të drejtpërdrejtë me shikuesin dhe pa dyshim ndikon në jetën e njeriut modern.

Fillimi i artit teatror në vendin tonë lidhet me emrin e mësuesit të Rilindjes, dramaturgut, figurës publike dhe gazetarit Dobri Vojnikov (1833 - 1878). Ai është gjithashtu regjisori dhe autori i parë bullgar i pjesëve teatrore. Ajo më e njohur e vënë në skenë është "Qytetërimi i keqkuptuar" i vitit 1871.

Teatri i parë profesional në Bullgari u krijua në vitin 1881 në Plovdiv. Dy francezë, Bossy dhe Brune, e kthyen një shtëpi të bukur të vjetër në hotel. Për të konkurruar me dy hotele të tjera në qytet, ata vendosën të ndërtonin një godinë të re në oborrin e tyre posaçërisht për shfaqje teatrale. Kështu u shfaq salla e parë e teatrit në vendin tonë - Teatri Ndërkombëtar "Luksemburgu", pothuajse 20 vjet pas shfaqjeve të para teatrale në Bullgari.

Në Ditën Botërore të Teatrit për të 48-ën herë do të jepen çmimet vjetore të Bashkimit të Artistëve në Bullgari. Çmimet Kombëtare të Arteve Skenike IKAR e vënë theksin tek arritjet e artistëve bullgarë në 22 kategori. Bashkimi Artistëve në Bullgari njoftoi paraprakisht se do të ketë tre fitues të çmimeve speciale IKAR 2022. Për nder dhe dinjitet çmimi i jepet aktorit Simeon Aleksiev, për kontribut të jashtëzakonshëm në muzikë do të dekorohet këngëtarja Mimi Nikollova, regjisori Asen Shopov do të marrë çmimin për kontribut të jashtëzakonshëm në Teatrin bullgar.

Përpiloi: Gergana Mançeva

Përgatiti në shqip: Vesella Mançeva