Më 22 shkurt në Bratisllavë do të prezantohet ekspozita virtuale “Të pyesim Sirakun – 140 vjet nga lindja e Sirak Skitnik”. Ekspozita, një punë e profesorit të Akademisë Kombëtare të Arteve, Prof. Bojan Dobrev si dhe një ekip nga programi Hristo Botev, është një nga veprat, me të cilat BNR shënoi përvjetorin e lindjes së drejtorit të saj të parë Sirak Skitnik dhe 80 vjet nga vdekja e tij. Tani, një ekip i mediave tona do të vizitojë komunitetin bullgar në kryeqytetin sllovak dhe Institutin Bullgar të Kulturës, ku do të prezantohet trashëgimia krijuese dhe idetë e artistit, kritikut, poetit, figurës teatrale dhe publike të talentuar Panajot Todorov Hristov, i cili hyri në histori me pseudonimin Sirak Skitnik (Jetim Endacak).

“Nëse i analizojmë veprat e tij, do të shohim se ai është jashtëzakonisht aktual” – është e bindur skenaristja e projektit dixhital Mihajlina Pavllova, sipas së cilës edhe sot ke se për cfarë “ta pyesësh” Sirakun.

Siraku është një ndërmjetës i madh që gjen qëllimet e njerëzve - thekson prof. Bojan Dobrev dhe tregon ndjenjat e tij personale: - Fytyra e tij është shumë e këndshme si rrezatim dhe nëse duhet të jemi të sinqertë, ndoshta në të është mbledhur më e mira e Bullgarisë në vitet 30 dhe vitet 40, si stili dhe fryma e asaj kohe”.

Dhe megjithëse sipas idesë së drejtuesit të saj të parë, i cili ishte jashtëzakonisht përparimtar në pikëpamjet e tij, radioteatri lindi në ish-Radio Sofjen, si dhe ideja e një memorjeje tingulli, e realizuar përmes Fondit Arkiv të mediave tona, rezulton se Radioja nuk ka një regjistrim autentik të Sirak Skitnik dhe në multimedia ai është përfaqësuar nga aktori Rusi Çanev.

"Kjo ekspozitë virtuale mori çmimin "Sirak Skitnik" për krijimtari origjinale dixhitale. Ne do të përfitojmë nga mikpritja e zonjës Vanja Radeva në Bratisllavë për ta prezantuar ekspozitën së bashku me krijuesin e saj, Prof. Bojan Dobrev, pedagog dhe ekspert në artet pamore." – shpjegon Kin Stojanov, drejtor i programit “Hristo Botev”. Dëgjuesit e radios publike do ta shohin ngjarjen përmes programit "Çfarë po ndodh", i cili për herë të parë do të kalojë kufijtë e Bullgarisë dhe do të dëgjohet në programin "Hristo Botev" më 22 shkurt nga ora 17:00 deri në 18:00 me orën bullgare.

Veprimtaria në Bratisllavë, ku do të marrë pjesë drejtori i tanishëm i BNR-së, Milen Mitev, si dhe kryeredaktori i Radio Bullgarisë Krasimir Martinov, është pjesë e programit aktiv të Institutit Bullgar të Kulturës për promovimin e artit vendas.

Dy vjet më parë, Instituti në Bratisllavë festoi 50 vjet nga themelimi i tij - kujton drejtoresha e institutit Vanja Radeva në një intervistë për BNR. Ngjarja u shënua nga një shfaqje e një grupi teatror bullgar në Teatrin Kombëtar në sheshin qendror të qytetit. Një fakt interesant është se kjo ndërtesë teatri është ndërtuar nga të njëjtët arkitektë që projektuan Teatrin Kombëtar Ivan Vazov në Sofje.

Përgatiti në shqip dhe publikoi: Kostandina Bello