“Ne po punojmë për të festuar përvjetorin, por ngjarjet janë ende në proces planifikimi”, tha Janeta Dimitrova për Radio Bullgarinë dhe pranoi se janë duke përgatitur një surprizë të hershme për festën e një prej figurave më të rëndësishme në jetën e fëmijëve - nënës.

"Çdo prind që e kupton se fëmija i tij duhet të mësojë bullgarisht, ka bërë tashmë një hap të madh përpara në zhvillimin e tij. Kjo gjuhë ruhet së pari në familje, pavarësisht vështirësive. Nëna bullgare është një heroinë nënë, veçanërisht kur jeton jashtë vendit, sepse ndonjëherë duhet të kapërcejë shumë vështirësi dhe paragjykime në mënyrë që fëmija i saj të mund të studiojë në një shkollë bullgare, pavarësisht se në ç’vend të botës ndodhet. Dhe hallka e rradhës e cila mbështet mësimin e gjuhës bullgare dhe që është me të vërtetë shumë e rëndësishme – është shkolla bullgare jashtë vendit. Ky është vendi ku fëmijët jo vetëm mësojnë të shkruajnë e të lexojnë, por ne u japim atyre thelbin e bullgarishtes - kulturën, traditat, vetëdijen dhe gjithçka, duke shpresuar që me kalimin e viteve, ata të mos harrojnë se kush janë. Ky është misioni ynë.“

Njësoj siç është vetë Janeta Dimitrova - një nga shumë gratë e rëndësishme bullgare në mbarë botën që ua përcjell fillin e atdheut të tyre brezave të ardhshëm. Ajo mbërriti në Tokën e Dashurisë më shumë se shtatë vjet më parë, e udhëhequr nga zemra e saj - duke ndjekur të shoqin, një mjek anesteziolog, i cili gjeti një zhvillim më të mirë profesional në Francë.

Si ndihem?! Si një grua bullgare që përmbush një mision. Kur u largova nga Bullgaria, kuptova se misioni im ishte i lidhur me këtë shkollë bullgare dhe sidomos me gjuhën bullgare. “Nuk e kisha menduar më parë kështu, por ndjeja se kisha rilindur dhe se jeta ime kishte nisur sërish pikërisht me këtë mision – t’u jap fëmijëve atë që di dhe mund të bëj”, pranon ish-gazetarja, e cila nuk ka hequr dorë nga ëndrra e saj që një ditë të kthehet në vendlindje.

Janeta Dimitrova është edhe forca kryesore shtytëse e Konkursit Ndërkombëtar letrar "Pena Magjike", të cilin Shkolla Bullgare "Ivan Vazov" në Paris e organizon për të dytin vit radhazi.

„Fëmijëve u pëlqen të shkruajnë për botë të jashtëzakonshme. Ndryshe nga të rriturit, ata dalin nga vrima e çelësit të botës sonë të mbyllur dhe fluturojnë të lirë dhe mendojnë, pa asnjë pengesë. Ata shkruajnë për kafshët magjike, veçanërisht ata më të vegjëlit, dhe këto kafshë magjike bëjnë gjëra të mira. Fëmijët besojnë në veten e tyre, besojnë në grimcën e së mirës në çdo qenie njerëzore, dhe jo vetëm njerëzore. Kjo është arsyeja pse ata kanë sukses në çdo gjë dhe shpresoj që jo vetëm të kenë sukses në punët e tyre dhe në botën e tyre, por do të kenë sukses edhe në botën reale. Dhe nëse i lëmë ta ndërtojnë një ditë, ne mund të mësojmë - nga emocionet e tyre, nga mënyra e tyre për t'ia dalë me të keqen dhe vështirësitë. Ne thjesht kemi fëmijë të mrekullueshëm bullgarë! Fëmijët tanë nuk duhet ta harrojnë gjuhën bullgare. Ajo është një nga erëzat tona, është një nga magjitë tona”, thotë në mënyrë kategorike Janeta Dimitrova.

Rezultatet e konkursit “Pendë Magjike” priten në fillim të muajit maj, ndërsa ceremonia e ndarjes së çmimeve do të zhvillohet në Paris në fund të qershorit.

"Ne nuk mund ta ndalim kohën për momentin. Nuk ka asnjë mënyrë për t'i bërë bullgarët të qëndrojnë në Bullgari nëse nuk janë të kënaqur me diçka, ose nëse mendojnë se bota po hap një derë më të gjerë për ta. Por ne mund dhe duhet ta bëjmë atë që të mbetemi bullgarë. Për mua, nuk ka rrezik (për Bullgarinë) për sa kohë që ne e dimë se kush jemi, për sa kohë që jemi të vetëdijshëm, për sa kohë që ka një vend që na tërheq si një magnet. Dhe kush më thotë se Bullgaria është një libër i mbyllur për të dhe se nuk do të kthehet më, nuk e besoj!“ - është e bindur Janeta, me sqarimin se shteti i Bullgarisë është i ndryshëm nga vendlindja e saj Bullgaria dhe njerëzit që jetojnë atje dhe ajo i do.

Foto: Facebook / Janeta Dimitrova, Shkolla Bullgare "Ivan Vazov" në Paris

Përgatiti në shqip dhe publikoi: Kostandina Bello