Ditën e dyzetë pas Ngjalljes së Tij, Zoti Jezu Krisht iu shfaq dishepujve të Tij për herë të fundit. Kur Apostujt u mblodhën për lutje, Krishti iu shfaq atyre, foli me ta dhe i udhëhoqi në Malin e Ullinjve pranë Jerusalemit. Bashkë me ta ishte edhe Nëna e Zotit.

Ndërsa ata u ngjitën në mal, Krishti ngriti lart duart për t'i bekuar. Ndërsa po i bekonte, Ai u nda prej tyre dhe u mor lart nga toka dhe, u ngjit gradualisht në qiell tek Ati i Tij qiellor, derisa u bë i padukshëm (Luka 24:50). Apostujt adhuruan Zotin e Ngjitur dhe nuk mund t'i hiqnin sytë nga pamja e mrekullueshme. Në atë çast, dy engjëj me rroba të bardha qëndruan para tyre dhe thanë: “Burra të Galilesë, pse qëndroni duke shikuar lart në qiell? Ky Jezus, që u mor në qiell nga mesi juaj, do të kthehet në të njëjtën mënyrë, me të cilën e patë të shkonte në qiell” (Veprat 1:11) në konfirmim të fjalëve të Krishtit (Mat. 26:64) për Ardhjen e Tij të Dytë të madhe dhe Gjykimin Universal. Të ngushëlluar nga engjëjt, apostujt u kthyen në Jerusalem, të gëzuar, gati për të përhapur fjalën e Ungjillit.

Festa e Ngjitjes së lavdishme të Zotit Krisht në Qiej kremtohet nga Kisha që nga shekujt IV-V dhe i përket festave të lëvizshme.

Me ngjitjen e Tij në qiell, Jezusi e përfundoi veprën e shpëtimit, duke na hapur qiellin të gjithëve. Prandaj populli bullgar e quajti festën Spasovden (Ditën e Shpëtimit).

Lexoni më shumë nga koleksioni i Radio Bullgarisë:

• Ngjitja e Zotit Jezu Krisht në Qiell është ndër festat e preferuara të bullgarëve

• Traditat popullore në Ditën e Ngjitjes së Zotit Krisht në qiej

Redaktoi: Ekipi i Radio Bullgarisë me ndihmën e Aleksandra Karamihalevës, kryeredaktore e "Gazetës së Kishës"

Përgatiti në shqip dhe publikoi: Svetllana Dimitrova

Foto: sveticarboris.net, pravoslavieto.com