Në ditën e pesëdhjetë pas Ngjalljes së Krishtit, kur apostujt u mblodhën së bashku, papritmas nga qielli u dëgjua një zhurmë si ajo e një ere të fuqishme që fryn me shpejtësi, dhe kjo zhurmë mbushi tërë shtëpinë ku ishin të mbledhur apostujt. U shfaqën flak zjarri, të cilat u ndanë dhe u ulën mbi secilin prej tyre. Dhe të gjithë u mbushën me hirin e Frymës së Shenjtë dhe filluan të flisnin në gjuhë të ndryshme, të panjohura për ta deri atëherë, ashtu siç Fryma u jepte atyre të flisnin. Apostulli Pjetër, i frymëzuar nga Fryma e Shenjtë, tha një fjalë të zjarrtë që i preku thellë zemrat e dëgjuesve. Ata pyetën: “Çfarë duhet të bëjmë?” – dhe apostulli Pjetër u përgjigj: “Pendohuni dhe secili prej jush le të pagëzohet në emër të Jezu Krishtit për faljen e mëkateve; dhe ju do të merrni dhuratën e Frymës së Shenjtë.”

Thirrja nuk ishte e kotë—rreth tre mijë njerëz besuan dhe u pagëzuan atë ditë. Kështu u vu fillimi i Kishës së Krishtit dhe Rrëshajët (Pentekosti) u vendos si ditëlindja e saj.

Të nesërmen - Ditën e Shpirtit të Shenjtë, Kisha i bën nderime të veçanta Personit të tretë të Trinisë së Shenjtë - Shpirtit të Shenjtë, Zotit, Jetëdhënësit, i Cili buron nga Ati dhe të Cilin ne e adhurojmë dhe e lavdërojmë së bashku me Atin dhe Birin. Veprimi i Shpirtit të Shenjtë tek apostujt në ditën e Pentekostit shkakton një ndryshim të thellë të brendshëm, i transformon ata dhe i mbush me forcë, mençuri dhe guxim.

Fryma e Shenjtë është “jetëdhënëse”—një parim hyjnor që gjallëron, shenjtëron dhe ndriçon.

Të dyja festat në kalendarin ortodoks këtë vit bien më 8 dhe 9 qershor.

Lexoni më shumë nga koleksioni i Radio Bullgarisë:

• Dhurata e Rrëshajëve është jetë e bollshme

• Hiri i Frymës së Shenjtë është në unitetin, pastërtinë e besimit dhe devotshmërinë

Redaktoi: Ekipi i Radio Bullgarisë me ndihmën e Aleksandra Karamihalevës, kryeredaktore e "Gazetës së Kishës"

Përgatiti në shqip dhe publikoi: Svetllana Dimitrova

Foto: Mitropolia e Shenjtë e Sofjes