Tre grupet më të mëdha në Parlamentin Evropian – Partia Popullore Evropiane (PPE), Grupi i Aleancës Progresive të Socialistëve dhe Demokratëve, si dhe grupi liberal “Rinovo Evropën” – u dakorduan që të hiqen nga projekt-raporti për progresin e Maqedonisë së Veriut të gjitha përmendjet e termave “identitet maqedonas” dhe “gjuhë maqedonase”.

Kjo ka ndodhur me kërkesë të PPE-së, bëri të ditur eurodeputeti Andrej Kovaçev përmes një postimi në Facebook. Ai pret që javën e ardhshme, në seancën plenare, ky amendament ndaj projekt-raportit të mbështetet edhe nga shumica në Parlamentin Evropian. Çështjet që lidhen me identitetin dhe gjuhën nuk kanë vend në një raport për progresin e një vendi kandidat për anëtarësim në BE, thekson Kovaçev. Sipas tij, tema të tilla çojnë vetëm në përçarje dhe hapin “kutinë e Pandorës”. Kjo, sipas tij, vërtetohet edhe në rastin konkret nga deklaratat e vazhdueshme të qeverisë në Shkup, dhe në mënyrë të veçantë nga kryeministri Hristijan Mickoski, me manipulimet e tij për një “identitet dhe gjuhë shumë shekullore”, shton Kovaçev, i cituar nga BTA.

Redaktoi: Ivo Ivanov

Përgatiti në shqip dhe publikoi: Svetllana Dimitrova

Foto: Parlamenti Evropian