Deri më 2 shtator në kryeqytetin japonez po mbahet “Festivali Bullgar”. Ngjarja po realizohet për herë të parë dhe ka për qëllim t’i prezantojë publikut japonez kuzhinën bullgare dhe produktet tradicionale bullgare, njofton përfaqësia diplomatike e Bullgarisë në Tokio.

Për festivalin u përgatit një menu speciale me ushqime të njohura bullgare, dhe “fajtore” për këtë është bullgarja Ljubomilla Kostova-Joshida, e martuar me një japonez dhe banuese në Tokio prej 35 vitesh.

Në stendat me produkte bullgare vizitorët mund të provojnë dhe të blejnë gjithashtu: banica, rakia, mastikë, verë, ujë të gazuar me aromë trëndafili, çokollata, mjaltë, ujë trëndafili, reçel trëndafili, çaj trëndafili, vaj liri, kos bullgar dhe të tjera.

• Cila është shija e Bullgarisë - kuzhina si pjesë e kartës sonë turistike

Festivali bullgar po zhvillohet me mbështetjen e Ambasadës së Republikës së Bullgarisë në Tokio, në një dyqan lokal në lagjen Shinxhuku. Në hapjen zyrtare të ngjarjes, më 27 gusht, morën pjesë ambasadorja Marieta Arabaxhieva, punonjës të ambasadës si dhe përfaqësues të udhëheqjes së objektit tregtar.

Vetëm disa ditë më parë  më 21 dhe 22 gusht, Tokio ishte mikpritës edhe i Kampionatit Botëror të Sushi-t (World Sushi Cup Japan 2025). Në garë morën pjesë mjeshtër sushi nga 17 shtete. Bullgari Martin Vlladimirov u bë i pari bullgar që merr një çmim në këtë ngjarje prestigjioze. Pjata e tij prej autori, “Lugina e trëndafilave”, u nderua me një çmim special për kreativitet, i dhënë nga një nga pesë sponsorët më të mëdhenj të Kupës Botërore të Sushi-t.

Prezantimi i Martin Vlladimirovit ishte i veçantë edhe përmes sfondit muzikor. Kënga kozmike “Doli Deljo Kaçak” në interpretim të këngëtares Vallja Balkanska u dëgjua në Tokio gjatë performancës së tij, duke shtuar një shtresë të veçantë emocioni dhe identiteti kulturor bullgar.

Lexoni më shumë nga koleksioni i Radio Bullgarisë:

• Ftojmë japonezët të xhirojnë një film për Bullgarinë si destinacion turistik

• Televizioni japonez promovon Bullgarinë si një destinacion turistik

• Iren Veliçkova-Jamami jeton në Japoni, por nuk ndalet së qëndisuri

• Ljutenica, dhe tani byreku - Makiko dëshiron të imponojë një tjetër ushqim bullgar në Japoni

• Me paella ose si salcë qumështi - sesi Makiko imponoi lutenicën bullgare në Japoni

Redaktoi: Krasimir Martinov

Përgatiti në shqip dhe publikoi: Svetllana Dimitrova