Mbrëmjen e 22 shtatorit filloi Viti i Ri Hebraik – Rosh Hashana. Sipas kronologjisë së Torës, nisi viti 5786 nga krijimi i botës. Sipas besimit hebraik, në këtë ditë Zoti krijoi njeriun e parë, Adamin. Sipas traditës hebraike, në dhjetë ditët që pasojnë deri në festën e Jom Kipur – Dita e Shlyerjes së Mëkateve, i Gjithëfuqishmi hap “Librin e Jetës”. Bazuar në vlerësimin e veprave të njeriut gjatë vitit të kaluar, Zoti vendos cilët njerëz do të regjistrohen në Librin e Jetës për vitin e ri. Në dy ditët e para të festës, të gjithë shkojnë në sinagogë për t’u lutur për veten, për familjet dhe të afërmit e tyre, si dhe për atdheun. Nuk ka tryeza të zbukuruara, por përulësi dhe pendesë.

Me tingullin e bririt të dashit – shofar, që dëgjohet nga sinagogat, besimtarët thirren drejt pendesës dhe zgjimit shpirtëror. Sipas zakonit, deri më 24 shtator, hebrenjtë besimtarë shkojnë pranë ndonjë ujë të rrjedhshëm për të hedhur copa buke, duke simbolizuar në këtë mënyrë “larjen” e mëkateve të tyre.

Në tryezën festive, hebrenjtë vendosin molla me mjaltë, me dëshirën për një vit të mirë dhe të ëmbël. Molla është simbol i frytit të ndaluar dhe rënies në mëkat, ndërsa mjalti përfaqëson Tokën e Premtuar, ku “rrjedhin mjaltë dhe qumësht”. Në tryezë vendosen gjithsej shtatë pjata, të cilat lidhen me shëndetin, lumturinë dhe mirëqenien e familjes.

Mësoni më shumë nga arkivi ynë:

• Një qendër e re arsimore dhe kulturore do të prezantojë traditat dhe komunitetin hebre

Redaktoi: Ivo Ivanov

Përgatiti në shqip dhe publikoi: Svetllana Dimitrova

Foto: alef-bg.org