Gjatë vitit akademik 2025/2026, Holanda, Austria, Gjermania, Italia dhe Spanja janë ndër vendet më të kërkuara për arsimin e lartë nga maturantët bullgarë. Këtë e bëri të ditur Nikollaj Hristanov në edicionin e vjeshtës të panairit “Arsimi Botëror”. Sipas statistikave të përmendura, 27% e të gjithë studentëve të rinj të regjistruar zgjodhën Holandën, e ndjekur nga Austria me 12% dhe Spanja me 11%. Gjermania dhe Italia renditen në pozicionet pasuese me nga 9% secila, ndërsa Mbretëria e Bashkuar tërheq vetëm 8% të kandidatëve, raportoi BTA.

Nxënësit bullgarë vazhdojnë të orientohen drejt degëve si biznes dhe menaxhim, teknologji kompjuterike, ekonomi dhe shkenca inxhinierike. Në të njëjtën kohë, po rritet interesi për degët kreative, si dhe për programet e lidhura me inovacionin dhe teknologjinë – inteligjencën artificiale, mediat digjitale dhe robotikën.

Nikollaj Hristanov njoftoi se gjatë pesë viteve të fundit, numri i kandidatëve për universitetet britanike ra ndjeshëm për shkak të Brexit-it dhe ndryshimit të kushteve financiare për studentët nga BE.

Në të kundërtën, Holanda u pozicionua si lidere, me mbi 5400 studentë bullgarë në vitin 2024. Universitetet atje dallohen për tarifa të përballueshme, një portofol të pasur programesh dhe mundësi financimi.

Gjermania mbetet një zgjedhje tradicionale për nxënësit nga gjimnazet me mësimdhënies së gjuhës gjermane, të cilët shpesh orientohen drejt universiteteve elitare.

Finlanda dallohet si një destinacion i ri në rritje, falë modelit të saj modern arsimor dhe pjesëmarrjes aktive të universiteteve të saj në panairet “Arsimi Botëror”.

Redaktoi: Ivo Ivanov

Përgatiti në shqip dhe publikoi: Svetllana Dimitrova

Foto: BTA