Fillon ngjarja më e madhe e atletikës së lehtë në Bullgari – Wizz Air Sofia Marathon 2025. Më 11 dhe 12 tetor, rrugët e Sofjes do të shndërrohen në një skenë të sportit dhe kulturës. Edhe këtë vit, organizatorët raportojnë interes rekord nga pjesëmarrësit e regjistruar – për edicionin e 42-të të maratonës janë regjistruar mbi 8000 pjesëmarrës nga 66 shtete, të cilët do të dalin në vijën e startit më 11 tetor për garën masive prej 5 km, dhe më 12 tetor për distancat 10 km, 21 km (gjysmëmaratonë) dhe 42 km (maratonë e plotë). Itenerari prej 42 km mbetet e njëjtë si vitin e kaluar, me theks në qendrën e Sofjes, duke kaluar pranë monumenteve dhe pikave kulturore më të rëndësishme si: Katedralja “Shën Aleksandër Nevski”, Teatri Kombëtar “Ivan Vazov”, Dy ndërtesat e Parlamentit, Universiteti i Sofjes “Shën Kliment Ohridski”. Pika e nisjes dhe e përfundimit të maratonës është Sheshi “Knjaz Aleksandër I Batenberg”, përpara Galerisë Kombëtare të Arteve – Pallati. Të gjithë ata që përfundojnë me sukses garën do të marrin medalje, ndërsa për disiplinat kryesore është parashikuar një fond çmimesh, duke filluar nga 500 leva për vendin e dhjetë deri në 6000 leva për fituesit në distancën klasike.

"Në vijën e nisjes do të kemi sërish atletë elitarë nga shkollat më të njohura botërore të maratonës. Mes tyre do të jetë edhe fituesi i vitit të kaluar – Shadrack Kimaiyo. Presim të marrë pjesë edhe atletja që u rendit e pesta në kampionatin botëror të 100 km. Synimi ynë është të rrisim nivelin çdo vit", deklaroi në konferencën zyrtare për shtyp Milica Mirçeva, drejtoreshë sportive e Wizz Air Sofia Marathon.

"Këtë vit kemi sërish një kauzë bamirësie: do të dhurohen 4000 leva për të ndihmuar sportistë me nevoja të veçanta. Ndër ta është edhe Radena Angelova, sportiste jonë në disiplinat alpine të skive me Sindromën Down – e vetmja bullgare që përfaqëson vendin në garat botërore në këtë sport", theksoi drejtori organizativ i maratonës, Anatoli Iliev. Skena të veçanta muzikore do të krijojnë një atmosferë më të gëzueshme dhe argëtuese për publikun gjatë garës. Ato do të vendosen përgjatë të gjithë itinerarit, dhe skena më e madhe do të vendoset në pikën e startit, ku më 12 tetor në orën 08:45 me orën bullgare, Ansambli "Çinari" do t’i japë ritëm e maratonës.

Maratona e Sofjes ka një histori mbi 40-vjeçare – edicioni i parë është zhvilluar në vitin 1983.

Përgatiti në shqip dhe publikoi: Kostandina Bello

Foto: Facebook /Wizz Air Sofia Marathon, sofiamarathon.bg, info.5kmrun.bg