Mediat publike botërore diskutojnë sfidat bashkëkohore në Sofje

Presidenti Rumen Radev: Mediat duhet të kërkojnë dhe të ndajnë të vërtetën, pavarësisht nëse është e përshtatshme apo jo

botuar më 25-10-21 1.55.MD

Presidenti Rumen Radev

Foto: Ani Petrova

Nuk ka demokraci dhe liri pa liri të fjalës dhe pluralizëm. Këtë e deklaroi Presidenti Rumen Radev në hapjen e Konferencës Vjetore të Shoqatës Ndërkombëtare të Mediave Publike në Sofje. Radioja Kombëtare Bullgare është mikpritëse e forumit për herë të parë, në të cilin marrin pjesë 24 stacione radiotelevizive nga 5 kontinente.

BNR organizon takimin vjetor të mediave publike nga pesë kontinente

Rumen Radev theksoi se mediat "duhet të kërkojnë të vërtetën dhe ta ndajnë atë, pavarësisht nëse u përshtatet të fuqishmëve të kohës ekonomikisht dhe politikisht, dhe duhet të jenë në gjendje t'i rezistojnë presionit për heshtjen dhe censurën".

Mediat publike janë ndër shtyllat kryesore të shoqërive demokratike dhe misioni i tyre është më i rëndësishëm se kurrë në epokën e dezinformimit. Këtë e deklaroi Drejtori i Përgjithshëm i Radios Kombëtare Bullgare, Milen Mitev, në hapjen e Konferencës Ndërkombëtare.

Drejtori i Përgjithshëm i BNR-së Milen Mitev

Mitev vuri në dukje se në shikim të parë, mediat publike duken të qëndrueshme - ato janë organizata të mëdha me një histori të gjatë dhe arkiva të pasura që janë një pjesë e rëndësishme e kulturës kombëtare. Por, sipas fjalëve të tij, një vështrim më i afërt zbulon "një pamje të ndryshme dhe gazetaria nuk është përballur kurrë me sfida kaq serioze".

"Media të financuara me fonde publike, por të pavarura nga pushteti publik - kjo na jep lirinë për të ndjekur vetëm një interes - atë të shoqërisë. Mediat publike në një shoqëri demokratike nuk mund të përdoren si mjet sulmi, por ne jemi një linjë e mrekullueshme mbrojtjeje. Mbrojtje kundër dezinformimit, kundër manipulimit, kundër gënjeshtrave", tha Mitev.

Për të arritur audiencën tonë, ne tashmë mbështetemi te konkurrentët tanë kryesorë - platformat e mëdha online. Ato janë aq të fuqishme sa nuk mund të punojmë pa to dhe po bëhemi të varur, paralajmëroi Drejtori i Përgjithshëm i Radios Kombëtare Bullgare dhe theksoi nevojën për financim të qëndrueshëm për mediat publike.