Pesë vjet më parë /11 nëntor 2020/ në Modena të Italisë u përurua një pllakë përkujtimore kushtuar basit të famshëm botëror bullgar Nikollaj Gjaurov /1929 - 2004/. Ishte në këtë qytet italian që këngëtari ynë i shquar i operës jetoi dhe punoi nga viti 1981 deri në vdekjen e tij. Pllaka përkujtimore u ndërtua me ide të Konsulles së atëhershme të Përgjithshme të Bullgarisë në Milano Tanja Dimitrova dhe është vepër e skulptorit Petko Jordanov. Ajo është vendosur në murin e institutit muzikor "Vecchi-Tonelli" në rrugën “Carlo Goldoni” 2. Pllaka mban kushtimin: "Në mirënjohje për këngëtarin e madh bullgar të operës që e lavdëroi atdheun tonë në të gjithë botën".

Nikollaj Gjaurov ndërtoi një urë kulturore midis Bullgarisë dhe Italisë, hapi sezonin e La Scala në Milano gjashtë herë dhe la një gjurmë të thellë në botën e operës.

Karriera e këngëtarit tonë të madh, e cila quhet "përrallë", filloi rastësisht kur kompozitori Petko Stajnov dëgjoi ushtarin Gjaurov dhe pa hezitim e drejtoi në fushën e këndimit, thonë nga Opera dhe Baleti i Sofjes. Pasi studioi me Profesor Hristo Brëmbarov, basi i ri u dërgua për të përmirësuar aftësitë e tij në Konservatorin e Moskës. Në vitin 1955, konkursi ndërkombëtar i këndimit në Paris u bë fillimi i një karriere të jashtëzakonshme artistike që kaloi nëpër skenat më të njohura botërore. Roli debutues i Gjaurov ishte Don Basilio, të cilin ai e interpretonte pothuajse deri në fund. Rolet e Boris Godunov, Mefistofelit nga “Fausti” dhe Filipit II nga “Don Karlosi” i sollën atij sukses triumfues.

Nikollaj Gjaurov e zhvilloi talentin e tij në Itali, duke debutuar në La Scala në moshën 30 vjeç në operën “Boris Godunov”. Gruaja e tij ishte këngëtarja e madhe e operës sopranoja Mirella Freni, e cila ishte nga Modena.

Redaktoi: Miglena Ivanova

Përgatiti në shqip dhe publikoi: Vesella Mançeva

Foto: BTA, Konsullata e Përgjithshme e Bullgarisë në Milano të Italisë, V. Balevska