Presidenti Rumen Radev vendosi veton ndaj ndryshimeve ligjore lidhur me emërimin e një menaxheri të veçantë tregtar në rafinerinë e "Lukoil" në Burgas. Në arsyetimin e tij, kreu i shtetit thekson se ndryshimet minojnë sundimin e ligjit në vend, bien ndesh me normat kryesore ligjore evropiane dhe paraqesin një rrezik të lartë për financat publike. Ai kujton se çështja e menaxherit të veçantë u rregullua ligjërisht që dy vjet më parë, duke përfshirë masa sigurie kundër abuzimeve, të pranuara edhe në vende të tjera evropiane me raste të ngjashme, për të minimizuar rrezikun e padive financiare ndaj shtetit. Me ndryshimet e miratuara të premten, këto masa sigurie hiqen pa argument.

Sipas presidentit, ndryshimet vendosin edhe rregulla të reja: menaxheri i veçantë mund të disponojë pa kufizime mbi aksionet dhe pjesëmarrjet në kapitalin e ndërmarrjeve të prekura, mund të shesë pronën e tyre, ndërsa kontratat që nënshkruan dhe aktet e organeve shtetërore do të jenë jashtë kontrollit administrativ dhe gjyqësor. Në praktikë, ndryshimet ligjore parashikojnë një nacionalizim të tërthortë të aktiveve të ndërmarrjeve dhe mundësinë për t’i transferuar më pas tek një rreth i pacaktuar i palëve të treta. Në këtë mënyrë, hapet një rrugë e gjerë për arbitraritet dhe abuzime, mendon Radev.

Më 7 nëntor, pas dy leximesh, parlamenti zgjeroi kompetencat e menaxherit të veçantë të një objekti të infrastrukturës kritike në vend me ndryshimet e miratuara. Më herët gjatë ditës, në korridoret e parlamentit, lideri i GERB, Bojko Borisov, njoftoi se tashmë u përcaktua se kush do të marrë postin e menaxherit të veçantë të rafinerisë në Burgas dhe emri u koordinua me SHBA-të dhe partnerët tanë evropianë.

Lexoni më shumë në arkivin tonë:

• Ministri i Energjisë: Karburantet në vend janë të mjaftueshme për një periudhë të gjatë

• Menaxheri shtetëror në “Lukoil” mund të jetë më shumë se një individ

• Shteti mori përsipër ruajtjen e pronave dhe zyrave të “Lukoil” në vend

• Parlamenti miratoi ndryshimet për menaxherin special të Lukoil

• Presidenti Radev për Lukoil: Ndryshimet e shpejta ligjore anulojnë masat mbrojtëse ekzistuese

Redaktoi: Miglena Ivanova

Përgatiti në shqip dhe publikoi: Svetllana Dimitrova

Foto: BGNES