Kamerat e sigurisë filmuan një ari në një lagje banimi të qytetit Karllovo para disa ditësh. Grabitqari zbriti deri te shtëpitë në pjesën veriore të qytetit dhe u shëtit pa u shqetësuar nëpër rrugë, derisa u tremb nga një makinë që kalonte. Pas sinjaleve të qytetarëve, menjëherë u siguruan patrulla 24-orëshe në qytet nga ekipet e Administratës Shtetërore të Pyjeve. Deri tani kafsha nuk ka shkaktuar dëme te njerëzit në Karlovo.

Megjithatë, ky rast nuk është i izoluar. Në vendbanime të ndryshme të Bullgarisë, takimet me arinjtë po bëhen më të shpeshta për shkak të mungesës së ushqimit natyror në natyrë, të kombinuar me ushqimin lehtësisht të arritshëm pranë njerëzve. Ngricat e hershme dëmtuan pemët frutore dhe lisat - ushqimi kryesor për arinjtë, gjë që po i bën ata të kërkojnë burime alternative në vendbanime, paralajmërojnë ekspertët e WWF-së. Sipas tyre, kjo nuk do të thotë një rritje e ndjeshme e popullatës, e cila mbetet e qëndrueshme, por është rezultat i kushteve të ndryshuara.

Si përgjigje ndaj rasteve gjithnjë e më të shpeshta, së fundmi WWF – Bullgaria nisi një fushatë informuese në rrjetet sociale, që synon t’i mësojë njerëzit si të sillen kur takojnë grabitqarin. Më e rëndësishmja është të ruhet qetësia dhe të mos vrapohet, sepse kjo mund ta provokojë arin. Duhet të bëhet një tërheqje e ngadaltë, pa iu kthyer shpinën. Kurrë nuk duhet të ushqehen arinjtë, sepse humbasin frikën natyrore dhe i lidhin njerëzit me ushqim të lehtë. Fushata thekson se informimi është çelësi për bashkëjetesën e sigurt me këtë specie të mbrojtur dhe të rëndësishme për ekosistemin tonë.

Lexoni më tepër në arkivin e Radio Bullgarisë:

• Para gjumit dimëror, arinjtë e rinj nga Ukraina gjetën strehë në Bullgari

• WWF Bullgaria i kushton vëmendje mbrojtjes së arinjve

• Pse dhe si të bëhemi "Mbrojtës i Ariut"?

• Kujdes, ariu! Takimet e grabitqarit me popullsinë vendase po bëhen gjithnjë e më të shpeshta

Përpiloi: Veneta Nikollova

Përgatiti në shqip dhe publikoi: Vesella Mançeva

Foto: BTA