Ministria e Punëve të Brendshme e Bullgarisë (MPB) po krijon një grup operativ të specializuar për luftën kundër pastrimit të parave, njoftoi ministria duke cituar ministrin e brendshëm Daniell Mitov. Në një takim pune me ambasadorin në detyrë të SHBA-së në Bullgari, Martin McDowell, dhe ekipin e sigurisë të ambasadës amerikane, ministri Mitov deklaroi se në këtë grup do të marrin pjesë policë nga Drejtoria e Përgjithshme e Policisë Kombëtare, Drejtoria e Përgjithshme për Luftën kundër Krimit të Organizuar, si dhe përfaqësues nga institucione dhe shërbime të tjera bullgare. Sipas njoftimit në faqen zyrtare të MPB-së, si udhëheqës i grupit u caktua Komisari i Lartë Javor Serafimov, zëvendësdrejtor i Policisë Kombëtare. Në njoftim theksohet se ndër prioritetet kryesore të MPB-së, të përcaktuara në programin e qeverisë "Zheljazkov", janë: përmirësimi i luftës kundër pastrimit të parave dhe financimit të terrorizmit, heqja e Bullgarisë nga lista gri e MONEYVAL. Sipas ministrit Mitov, krijimi i grupit operativ të specializuar (SOG) është hapi i parë, i cili do të përmirësojë ndjeshëm cilësinë e hetimeve dhe do të mbështesë realizimin e prioriteteve të qeverisë.

Redaktoi: Darina Grigorova

Përgatiti në shqip dhe publikoi: Svetllana Dimitrova

Foto: Ministria e Punëve të Brendshme